ब्रेकिंग

पर्यावरण दिनानिमित्त सह्याद्रीतील देवराईची प्लास्टिक प्रदुषणातून मुक्तता

Wrutuja pandharpure
08 Jun 2025

पुणे : प्लास्टिक प्रदूषणामुळे पर्यावरणाला होणार्‍या धोक्यांबाबतचा जागर वाढावा, देवराई सारख्या अतिसंवेदनशील अधिवासाचे व देवराईतील जीवसृष्टीचे रक्षण व्हावे या उद्देशाने अरण्य षष्ठी आणि पर्यावरण दिनानिमित्त ताम्हिणी अभयारण्य परिसरातील, सह्याद्री घाटमाथ्यावरील विंझाई देवराईची प्लास्टिक प्रदूषणातून या अनोख्या उपक्रमाद्वारे सुटका करण्यात आली.

जागतिक पर्यावरण दिन व अरण्य षष्ठीचे औचित्य साधून बायोस्फिअर्स; मूव्हमेंट अगेंस्ट बायोलॉजिकल इनव्हेजन (माबि); वनस्पतीशास्त्र विभाग, मॉडर्न महाविद्यालय, श्री विंझाई देवस्थान मंडळ, ताम्हिणी यांच्या संयुक्त विद्यमाने प्लास्टिक स्वच्छता मोहीम राबविण्यात आली. या अभियानात डॉ. सचिन पुणेकर, डॉ. प्राची क्षीरसागर, सायली सौदणकर, अभिजित भसाळे, सतीश सबनीस, सुधीर ताम्हाणे, मंदार पिंपळगावकर, तनय पिंपळगावकर, वरद पिंपळगावकर, संगीता सौदणकर, प्रमोद पिंपळगावकर, संध्या पिंपळगावकर सहभागी झाले होते.

संकलित केलेल्या प्लास्टिक कचर्‍यात प्लास्टिक पेले, शीतपेयाच्या बाटल्या, खाद्य-पदार्थांची वेष्टणे, विविध उत्सवात वापरले गेलेले प्लास्टिक साहित्य, पिशव्या मोठ्या प्रमाणात होत्या. स्वच्छता मोहीमा या देवराई किंवा इतर संवेदनशील अधिवासात ठिकठिकाणी करणे ही काळाची गरज आहे. भाविक, पर्यटकांनी प्लास्टिक वापर टाळावा, निसर्गात प्लास्टिक प्रदूषण नकरणे व निसर्गपूरक-निसर्गस्नेही सण साजरे करण्याचे आवाहन देखील आयोजकांच्या माध्यमातून यावेळी करण्यात आले. या प्रसंगी विंझाई देवीची पूजा आणि मंदिर परिसरात औदुंबर वृक्षाचे रोपण करून हरित दिन साजरा करण्यात आला.